Isip kabahin sa ilang agresibong lakang batok sa iligal nga armas, ang Cebu Police Provincial Office (CPPO) malampusong nakasakmit og 181 ka loose firearms sa tibuok lalawigan, base sa report nga gipagawas sa Police Regional Office 7 (PRO7) kagahaping adlawa, Marso 1, 2025.
Kini nga inisyatiba usa ka dakong lakang sa pagpalig-on sa seguridad ilabi na samtang nagkadool ang 2025 National ug Local Elections.
Si PBGen Redrico Maranan, Regional Director sa PRO7, mitambong sa firearms display nga gipahigayon sa CPPO Conference Room, Camp General Arcadio Maxilom, Doña Modesta Street, Sudlon, Cebu City, uban sa mga opisyal sa CPPO.
Ang mga armas nga nasakmit naglakip sa mga short ug long firearms, light weapons, ug improvised firearms nga nakumpiska pinaagi sa nagkalain-laing operasyon sama sa Oplan Katok, boluntaryong pagsurender, entrapment operations, ug search warrants. Pipila sa mga armas nga nakuha mao ang .45 caliber pistols, .30 caliber rifles, ug 5.56 caliber rifles, nga kasagarang nalambigit sa iligal nga kalihokan ug posibleng election-related violence.
Labaw sa tanan, may pipila ka mga armas nga konektado sa mga elected officials ug kandidato, nga nakuha sa nagkalain-laing lugar sama sa Talisay City, Carcar City, Compostela, Asturias, Borbon, Dalaguete, Pinamungajan, San Remigio, ug Balamban.
Ang nagpadayon nga kampanya nagpakita sa lig-on nga paningkamot sa CPPO aron masiguro ang usa ka hapsay ug kasaligan nga eleksyon karong Mayo.
Gihangyo usab niya ang mga tag-iya sa armas nga wala na’y balido nga lisensya nga mosunod sa regulasyon o boluntaryong isurender ang ilang armas aron malikayan ang posibleng kasong legal ilawom sa Comprehensive Firearms and Ammunition Regulation Act.
Sa katapusan, gipadayag ni PBGen Maranan ang iyang pasalamat sa CPPO leadership alang sa ilang lig-on nga kampanya ug gipasalig ang padayon nga suporta sa mga inisyatibo nga nagpunting sa seguridad sa lalawigan ilabi na sa umaabot nga eleksyon. (Renante Socia Lada)
(Source: PRO7- PIO)