Tulo ka buy-bust operations ang gihimo sa Bohol Police Provincial Office gikan Agosto 7 hangtod 8, 2025, nga miresulta sa pagkasait sa kapin ₱3.9 milyon nga kantidad sa gituohang shabu.
Una nga operasyon gihimo sa Balilihan Police alas 6:35 sa buntag, Agosto 7, sa Purok 2, Barangay Cogon. Nasikop ang target ug nakuha gikan kaniya ang 100 gramos sa shabu nga nagkantidad og ₱680,000, uban ang buy-bust money, cellphone, motorsiklo ug wallet nga adunay iligal nga drogas.
Ikaduhang operasyon gihimo sa Loon, Bohol alas 8:32 sa buntag sa samang adlaw. Nakapalit ang mga pulis ug drogas sa target apan misukol kini, mibalos ang usa ka pulis ug midagan paingon sa bukid ang suspetsado. Gibiyaan niini ang usa ka itom nga sling bag nga gisudlan og 255 gramo nga shabu nga nagkantidad og ₱1,734,000. Padayon ang hot pursuit ug roadblock aron madakpan siya.
Ikatulong operasyon gihimo sa Ubay, Bohol alas 3:21 sa kadlawon, Agosto 8. Nasikop ang target ug nakuha gikan kaniya ang 220 gramos nga shabu nga nagkantidad og ₱1,496,000 uban ang buy-bust money, cellphone, motorsiklo ug backpack nga adunay kontrabando.
Sumala ni PBGEN Redrico A. Maranan, Regional Director sa PRO7, resulta kini sa determinasyon ug sakripisyo sa kapulisan ug padayon pa nga lig-onon ang kampanya kontra iligal nga drogas aron masiguro ang kalinaw ug seguridad sa Central Visayas.
Source: PRO7-PIO
I via Renante Socia Lada