Nakarekober ang Police Regional Office 7 (PRO7) og kapin ₱1.5 milyon nga balor sa gidudahang shabu ug usa ka wala’y lisensya nga pusil atol sa buy-bust operation sa Barangay Buanoy, Balamban, Cebu, sayo sa buntag sa Pebrero 11, 2026.
Alas 2:40 sa kadlawon sa gihimong operasyon sa Balamban Municipal Police Station ubos sa Cebu Police Provincial Office, nadakpan ang duha ka giilang high-value drug suspects.
Narekober sa mga pulis ang usa ka sachet sa shabu nga gibaligya isip subject of sale, lima ka gagmay ug siyam ka medium nga sachet nga adunay sulod nga gidudahang shabu.
Ang kinatibuk-ang gibug-aton niini mokabat og 225.54 gramos ug adunay standard drug price nga ₱1,533,672. Nakuha usab ang usa ka pulang plastik nga botelya ug sling bag nga giingong sudlanan sa ilegal nga drogas.
Gawas niini, nasakmit usab ang usa ka .45 kalibre nga pistola, usa ka magasin, pito ka buhing bala, ug usa ka ₱500 nga gigamit isip buy-bust money.
Ang narekober nga ginadiling drogas nga gituohang shabu gipadala na sa Regional Forensic Unit 7 alang sa laboratory examination.
Ang duha ka suspek kasamtangang gitanggong sa Balamban MPS ug giandam na ang kaso batok kanila tungod sa paglapas sa Republic Act 9165, Republic Act 10591, ug Article 151 sa Revised Penal Code.
Matod ni PBGen Redrico A. Maranan, Director sa PRO7, magpadayon ang ilang hugot nga kampanya batok sa ilegal nga drogas ug mga armas sa Central Visayas.
Giawhag usab niya ang publiko nga magtinabangay ug motaho sa mga ilegal nga kalihokan sa ilang lugar.
Source: PRO7 PIO
I via Renante Socia Lada