Nadakpan sa kapulisan sa Bogo City ang usa ka wanted person nga gipasanginlan sa kasong rape ubos sa Article 266-A sa Revised Penal Code ug acts of lasciviousness nga may kalabotan sa R.A. 7610 o balaod nga nanalipod sa kabataan.
Ang suspek nga gitawag sa alyas “Roque,” 42 anyos, security guard ug residente sa Purok Bahamas, Barangay Libertad, Bogo City, nadakpan sa maong barangay niadtong buntag sa Pebrero 10, 2026 pinaagi sa Tracker Team sa Bogo City Police Station.
Ang pagdakop gibase sa warrant of arrest nga gipagawas sa Regional Trial Court, Branch 81, Seventh Judicial Region. Sa kasong rape, walay girekomendar nga piyansa, samtang sa acts of lasciviousness adunay piyansa nga ₱36,000.
Gipahibalo ang suspek sa mga kaso nga iyang giatubang ug sa iyang mga katungod sumala sa balaod sa dihang gidakop siya. Human sa hustong dokumentasyon, itugyan dayon siya sa korte nga nagpagawas sa warrant alang sa sunod nga proseso.
Matod ni PCOL Abubakar Udang Mangelen Jr., padayon ang ilang paningkamot sa pagdakop sa mga naglapas sa balaod aron masiguro ang hustisya, ilabi na sa mga kaso nga naglambigit sa krimen batok sa mga tawo.
Gisiguro usab sa Cebu Provincial Police Office ang ilang dedikasyon sa pagpanalipod sa kaluwasan sa publiko sa tibuok probinsya.
Source: CPPO
I via Renante Socia Lada
#rpndykccebu