Gimando ni Cebu Governor Pamela Baricuatro ang komprehensibong pagrepaso sa tanang kasamtangan ug gisugyot pa nga mga kasabutan nga may kalabotan sa mga yuta ug kabtangan sa Probinsya sa Sugbo. Gipirmahan niya ang Executive Order No. 7, series of 2026 niadtong Enero 26 aron mas palig-onon ang pagdumala sa mga asset sa kapitolyo.
Lakip sa repasohunon ang mga usufruct agreement, deed of donation, memorandum of agreement, public-private partnership, ug uban pang kasabutan nga naggamit sa mga yuta, building, ug economic enterprise assets sa probinsya—bisan pa kini og kauban ang pribadong kompanya, government-owned and controlled corporations, o national government agencies.
Sumala sa maong mando, ang nagkalain-laing opisina ug departamento sa probinsya, kauban ang Economic Enterprise Council (EEC), motan-aw pag-ayo sa mga kasabutan aron masiguro nga nasunod ang balaod, naprotektahan ang interes sa probinsya, ug nahiuyon sa mga plano sa kalamboan.
Gikinahanglan usab nga makakuha una og aprubal gikan sa EEC, nga gipangulohan sa gobernador, sa dili pa maaprubahan o mapirmahan ang bisan unsang kasabutan nga may kalabotan sa kabtangan sa probinsya. Apil usab sa proseso ang technical, legal, ug financial review.
Gipasabot sa Kapitolyo nga ang maong executive order dili mopuli o mag-usab sa kasamtangang mga balaod, kondili magpalig-on lamang sa mga panalipod aron masiguro ang transparency, accountability, ug maayong pagdumala sa mga kabtangan sa Sugbo alang sa kaayohan sa publiko ug sa dugayng kalamboan sa probinsya.
Source: Cebu Province PIO
I via Renante Socia Lada