Nakapakita og tinuod nga kalooy ug pagka-andam ang mga police sa Police Regional Office 7 (PRO7) human nila maluwas ang kinabuhi sa usa ka bata nga naglisod og ginhawa tungod sa hilanat ug pagkurog (convulsion) didto sa Lambusan Bridge, Barangay Lambusan, San Remigio, Cebu, Disyembre 3, 2025.
Samtang nag-follow-up sila sa usa ka kaso sa pagpangawat sa Bogo City Terminal, nahimamat nila PSSg Benedict Benito, Pat James Bryan Coyoca, ug PCMS Jim Susvilla ang usa ka bao-bao tricycle nga nangayo og tabang. Ang drayber misulti nga ang iyang pasahero, usa ka bata nga kuyog sa iyang apohan, naglisod na ug nagtuyok-tuyok ang mata tungod sa grabe nga hilanat.
Walay pagduha-duha nga mitabang ang mga pulis. Gipasakay nila ang bata sa patrol car ug dali nga gidala sa Bogo Provincial Hospital aron matambalan dayon.
Tungod sa ilang paspasan nga aksyon, naluwas ang bata ug nakadawat dayon og tukmang pag-atiman. Nagpakita kini nga ang serbisyo sa PRO7 dili lang kutob sa pagpatuman sa balaod, kundili lakip ang pag-atiman sa katawhan ug pagpanalipod sa kinabuhi.
Giingon ni PBGen Redrico A. Maranan, Regional Director sa PRO7:“This incident reminds us that policing is not just about enforcing the law—it is also about caring for the community and protecting every life. I commend PSSg Benito, Pat Coyoca, and PCMS Susvilla for their quick action and selfless dedication in ensuring a child in need received immediate help me.”
Nagpasalig usab si PBGen Maranan nga padayon ang PRO7 sa pagtubag sa emerhensya, pagpanalipod sa katawhan, ug pagpakita sa tinuod nga espiritu sa serbisyo ug pagkamatinud-anon sa tanang sakop sa kapulisan.
Source: PRO7 PIO
I via Renante Socia Lada