Nasikop sa kapulisan sa Police Regional Office 7 ang usa ka high-value individual ug nakumpiskar og gibanabanang 500 gramos nga gidudahang shabu nga nagkantidad og ₱3.4 milyon atol sa buy-bust operation sa Barangay Subangdaku, Mandaue City niadtong Mayo 11, 2026.
Ang suspetsado nga nailhan lamang sa alyas nga “Dalmie,” 48 anyos, nadakpan sa mga operatiba sa City Intelligence Unit ug City Drug Enforcement Unit sa Mandaue City Police Office mga alas 6:18 sa gabii sa Mantawe Drive Extension, Barangay Subangdaku.
Sumala sa kapulisan, daghang pakete sa gidudahang shabu ug uban pang drug paraphernalia ang ilang narekober panahon sa operasyon. Ang nakumpiskar nga ilegalnga drogas nga may gibug-aton nga 500 gramos adunay standard drug price nga mokabat og ₱3.4 milyon.
Gidala na sa Regional Forensic Unit 7 ang mga ebidensya alang sa laboratory examination samtang ang suspetsado gitanggong karon sa custodial facility sa Police Station 1 sa Mandaue City Police Office samtang giandam ang kaso batok kaniya tungod sa paglapas sa Republic Act 9165 o Comprehensive Dangerous Drugs Act of 2002.
Gidayeg usab ni Acting Regional Director PBGen Arnold E. Abad ang mga operatiba nga mibuhat sa malampusong operasyon.
Matud pa ni Abad, matag ilegal nga drogas nga makumpiskar nagpasabot og daghang kinabuhi ang mapanalipdan ug mas luwas nga komunidad alang sa katawhan sa Central Visayas.
Source: PRO7 PIO
I via Renante Socia Lada