Misalmot si PGEN Jose Melencio C. Nartatez Jr., Chief sa Philippine National Police (PNP), sa IED Threat and Security Symposium nga gihimo sa Panglao, Bohol sa Marso 17, 2026. Siya ang Guest of Honor ug speaker sa maong international nga kalihokan nga gi-organisar sa Southeast Asian International Command kauban ang Australian Federal Police.
Ang symposium naghiusa sa mga police ug security experts aron mapalig-on ang regional cooperation ug kahibalo sa pag-atubang sa hulga sa Improvised Explosive Devices (IED). Gitutukan sa aktibidad ang pagpalambo sa technical skills sa pag-ila, pag-analisar, ug pagsusi sa IED aron mas lig-on ang ebidensya ug masiguro ang hustisya batok sa mga suspek.
Sa iyang keynote speech, giklaro ni PGEN Nartatez ang kamahinungdanon sa symposium aron mahatagan ang mga pulis og espesyal nga kahibalo sa scientific analysis ug investigation sa IED-related incidents. Giingon niya nga importante ang pagpangusog sa investigative capability aron ang mga responsable sa hulga sa bomba mahibal-an, madakpan, ug maproseso sa korte.
Nagpasalamat usab siya sa organizers sa pagdani sa international symposium sa Pilipinas ug naglaum nga mas daghan pa nga susamang kalihokan nga makapalambo sa technical ug operational skills sa mga law enforcement agencies.
Si PBGen Redrico A. Maranan, Regional Director sa Police Regional Office 7, mipadayag sa iyang pasalamat sa Australian Federal Police sa pagdala sa symposium sa Central Visayas. Giingon niya nga dakong tabang kini sa kahibalo ug preparedness sa mga pulis sa pag-atubang sa mga hulga sa IED.
Ang IED Threat and Security Symposium kabahin sa international cooperation initiatives nga nagpalig-on sa regional security ug hiniusang tubag sa mga hulga sa explosive devices.
Source: PRO7 PIO
I via Renante Socia Lada