Nadakpan sa kapulisan sa Police Regional Office 7 (PRO7) ang usa ka giila nga drug lord ug iyang kauban atol sa buy-bust operation nga gihimo gabii sa Disyembre 14, 2025 sa Tagbilaran City, Bohol. Kapin ₱20.6 milyon nga kantidad sa gituohang shabu ang nakuha sa operasyon.
Matod sa pulis, alas 9:29 sa gabii gihimo ang buy-bust sa Purok 8, Barangay Poblacion 1, nga gipangulohan sa Tagbilaran City Police Station uban sa Bohol Police Provincial Office. Duha ka suspetsado ang nadakpan nga giila isip high-value drug personalities nga nag-operate sa Tagbilaran City ug mga silingang lungsod.
Sa operasyon, narekober ang daghang plastic sachet nga heat-sealed ug vacuum-sealed nga adunay gituohang shabu, uban ang drug paraphernalia ug mga gamit sa iligal nga transaksiyon. Ang nakuha nga shabu adunay kinatibuk-ang gibug-aton nga 3,040 gramos.
Ang mga iligal nga drogas gihatod na sa PNP Bohol Forensic Unit sa Camp Francisco Dagohoy alang sa laboratory examination. Ang mga nadakpan karon anaa sa kustodiya sa Tagbilaran City Police Station samtang giandam ang kaso batok kanila tungod sa paglapas sa Republic Act 9165 o Comprehensive Dangerous Drugs Act of 2002.
Sumala ni PBGen Redrico A. Maranan, Regional Director sa PRO7, klaro nga gigamit sa mga suspetsado ang holiday season aron ipakaylap ang iligal nga drogas. Busa, gipasidaan niya nga mas palig-onon pa sa PRO7 ang anti-illegal drugs operations aron mapanalipdan ang katawhan ug mapadayon ang kaluwasan sa Central Visayas, ilabi na karong holiday season.
Source: PRO7 PIO
I via Renante Socia Lada