Gisaulog sa Police Regional Office 7 (PRO7) ang promosyon sa ilang mga kapulisan atol sa CY 2025 Continuous ug Regular Promotion Programs nga gihimo Disyembre 15, 2025 sa PRO7 Headquarters, Camp Sergio Osmeña Sr., Cebu City, ubos sa pagpanguna ni Regional Director PBGEN Redrico A. Maranan.
Sa kinatibuk-an, 709 ka PNP personnel ang miaplay para sa promosyon ug miagi sa hugot nga interview ug evaluasyon. Sa niini, 392 ka kapulis ang malampusong napromote ug andam nang modala og mas dagkong responsibilidad sa ilang tagsa-tagsa ka yunit.
Gihimo usab dungan ang panumpa ug pag-pin sa ranggo sa nagkadaiyang police offices sa Rehiyon 7, lakip ang Cebu City, Mandaue City, Lapu-Lapu City, Bohol, Cebu Province, ug Regional Mobile Force Battalion. Ang mga napromote naglakip gikan Patrolman hangtod Police Lieutenant Colonel.
Matod pa ni PBGEN Maranan, ang matag promosyon resulta sa dugay nga pagserbisyo, disiplina, ug sakripisyo sa mga kapulisan. Gipasabot niya nga kini dili lamang pasidungog sa napromote, kundili inspirasyon usab sa ubang miyembro sa PNP nga nagtinguha mosaka sa ranggo.
Iyang gihangyo ang mga bag-ong napromote nga gamiton ang ilang bag-ong ranggo aron mas mapalig-on ang kaluwasan sa katawhan, ilabi na sa umaabot nga mga buluhaton sama sa holiday operations, Sinulog Festival, ug uban pang dagkong kalihokan sa rehiyon.
Source: PRO7 PIO
I via Renante Socia Lada