Malampuson nga nasiguro sa Police Regional Office 7 (PRO7) ang kaluwasan, kahapsay ug kalinaw sa Penitential Walk of Mary nga gihimo sa Enero 15, 2026, nga gitambongan sa gibanabana nga 216,000 ka deboto gikan sa nagkadaiyang bahin sa Central Visayas.
Gipatuman ang hugot nga seguridad sa tibuok ruta sa prosisyon nga misugod sa Archdiocesan Shrine and Parish of Our Lady of Guadalupe, miagi sa dagkong dalan paingon sa Fuente Osmeña Circle, ug natapos sa Basilica Minore del Sto. Niño. Gipakatap ang mga personnel sa PRO7 para sa seguridad sa ruta, crowd control, traffic management, public assistance, ug paspas nga pagresponde, uban sa suod nga koordinasyon sa Cebu Archdiocese, lokal nga panggamhanan, ug mga boluntaryo.
Natapos ang relihiyosong kalihokan, walay bisan usa ka security-related incident nga natala, nga nagpakita sa maayong pagplano, disiplina ug dedikasyon sa PRO7 sa pagpanalipod sa kaluwasan sa publiko ug sa relihiyosong pagtuo.
Gipasalamatan ni PBGEN Redrico A. Maranan, Regional Director sa PRO7, ang tanang pulis nga nagbantay sa kaluwasan ug kahapsay sa kalihokan. Matod niya, tungod sa dedikasyon sa kapulisan, malinawon ug walay kahadlok nga natuman sa mga deboto ang ilang pag-ampo ug panaw sa pagtuo.
Padayon ang security operations samtang ang mga balaang hulagway sa Our Lady of Guadalupe de Cebu ug Señor Santo Niño de Cebu magpadayon sa ilang panaw padulong sa National Shrine of St. Joseph sa Mandaue City, diin magpabiling alerto ang PRO7 aron masiguro ang kaluwasan ug kabalaan sa sunod nga mga kalihokan.
Source: PRO7 PIO
I via Renante Socia Lada