Paspas nga aksyon sa kapulisan ang mitultol sa pagdakop sa suspek sa kawat sa pondo sa simbahan sa Barangay Cadulawan, Minglanilla, sulod lang sa pipila ka oras human nahitabo ang krimen.
Sa Enero 15, 2026, nadakpan sa Minglanilla Municipal Police Station ang suspek nga nailhan lang sa alyas “Christine,” usa ka sales lady ug residente sa Barangay Bulacao, Cebu City, tungod sa kasong Robbery with Force Upon Things. Ang krimen nahitabo sa hapon sa Enero 14, 2026 sa usa ka relihiyosong pasilidad sa maong barangay.
Sumala sa imbestigasyon, nadiskobrehan sa biktima nga gisulod ang iyang gipuy-an pinaagi sa pagpugos sa pultahan, ug hapit ₱200,000 nga kuwarta ang nawala. Ang maong kantidad gikan sa Misa de Gallo ug mga donasyon sa Bag-ong Tuig. Sa CCTV footage, nakita ang suspek nga misulod sa lugar, misulay og abli sa daghang lawak, ug migamit og picklock tools sa wala pa moikyas padulong sa Cebu City.
Dali dayon, nakig alayon ang pulis sa biktima ug sa komunidad. Tungod sa kasayuran nga nakuha gikan sa mga residente ug barangay tanod, natultolan ang pulis sa pinuy-anan sa suspek, nga miresulta sa iyang pagdakop sa hot pursuit ug follow-up operation.
Nabawi usab sa kapulisan ang pipila sa nakawat nga kuwarta ug ang mga gamit nga gituohang gigamit sa krimen.
Gidayeg ni PCOL Abubakar Udang Mangelen Jr., Provincial Director sa CPPO, ang paspas ug propesyonal nga lihok sa kapulisan ug ang tabang sa komunidad. Matod niya, kini usa ka ehemplo sa “Makabagong Pulis sa Makabagong Panahon” nga matinud-anon, andam mutubag, ug may respeto sa katawhan.
Ang suspek gipahibalo sa iyang konstitusyonal nga katungod ug nagpabilin karon sa kustodiya sa kapulisan samtang giandam ang kaso batok kaniya sa Provincial Prosecutor’s Office.
Source: CPPO
I via Renante Socia Lada