Gipaila sa Kapitolyo sa Sugbo ang ilang mga kausaban ug plano sa serbisyong panglawas sa unang episode sa online nga programa nga “iStorya Cebu.” Ang programa naghisgot sa mga proyekto ug programa sa probinsya, ilabi na sa pagpaayo sa kahimtangan sa healthcare sa mga Sugboanon.
Ang episode nagtutok sa mga paningkamot sa administrasyon ni Gobernador Pamela Baricuatro aron mapaayo ang mga ospital ug health services sa probinsya nga dugay na napasagdan. Tumong sa probinsyal nga gobyerno nga mas lig-on ug mas kasaligan ang sistema sa panglawas sa Sugbo.
Gi-host ang programa sa Provincial Information Officer Ainjeliz de la Torre-Orong, ug ang unang bisita mao si Dr. Nikki Catalan, consultant sa Kapitolyo sa panglawas. Gipasalida ang maong episode sa bag-ong gi-ayo nga studio sa Kapitolyo.
Sumala kang Dr. Catalan, nagpadayon na ang mga kausaban sama sa pagdugang og health workers, pagpalit og bag-ong medical equipment, ug pagdugang sa budget alang sa mga ospital ug pasilidad sa sunod tuig. Bisan hinay usahay ang proseso tungod sa mga balaod sa gobyerno, gisiguro nga de-kalidad ang tanang proyekto.
Gilauman nga sa 2026, mas daghan pang bag-ong pasilidad ug building ang matukod ug ma-digitize na ang datos sa mga ospital aron mas paspas ang serbisyo. Tumong sa Kapitolyo nga makasalig ang mga Sugboanon nga maayo ug hapsay ang pag-atiman sa mga ospital nga pinadagan sa probinsya.
Source: Cebu Province PIO
I via Renante Socia Lada