Kapin sa 200 ka Senior High School students sa Abellana National School ang mitambong sa Youth Peace Summit nga gipahigayon sa Police Regional Office 7 (PRO7) isip kabahin sa pagsaulog sa ika-31 nga Police Community Relations (PCR) Month. Tumong sa kalihokan ang pagdasig sa kabatan-onan nga mahimong responsable, mahigugmaon sa kalinaw, ug aktibong makatampo sa kalamboan sa ilang komunidad.
Sa maong summit, 235 ka estudyante ang nakakat-on og mga leksyon bahin sa mental health, paglikay sa bullying ug kapintas, responsableng paggamit sa social media, ug pagpalig-on sa maayong pamatasan. Gipasiugdahan usab ang pagtinabangay sa kapulisan ug sa eskwelahan aron masiguro ang luwas ug malinawon nga palibot sa mga tinun-an.
Usa sa mga tigpamulong mao si Ret. PBGEN Sarah B. Abad, nga nag-awhag sa mga estudyante nga padayon nga mopili sa husto, motuo sa ilang kaugalingon, ug mangayo og tabang kon adunay problema sama sa bullying o abuso.
Gipasiugda usab niya ang papel sa pamilya, eskwelahan, komunidad, ug gobyerno sa pagpanalipod sa kabatan-onan.
Gipahinumdoman usab sa PRO7 ang mga estudyante nga tawagan dayon ang Emergency 911 kung adunay krimen o emerhensiya nga nanginahanglan og tabang sa kapulisan.
Matud sa PRO7, ang maong Youth Peace Summit kabahin sa ilang padayon nga programa aron mapalig-on ang kahibalo, disiplina, ug gugma sa kalinaw sa mga kabatan-onan.
I via Renante Socia Lada