Gibalik sa Police Regional Office 7 (PRO7) ang pahimangno sa publiko nga epektibo gihapon ang ipinatuman ang gun ban sa Commission on Elections (COMELEC) hangtod sa Hunyo 11, 2025, bisan pa natapos na ang 2025 National ug Local Elections.
Matod ni PRO7 Regional Director Police Brigadier General Redrico A. Maranan, padayon ang ilang operasyon sa tibuok Central Visayas aron masiguro ang pagsunod sa mga lagda sa eleksyon, ilabi na ang hugot nga pagpangdakop sa mga molapas sa balaod.
Gibuksan ang gun ban niadtong Enero 12 ug nagdili kini sa pagdala, pagbalhin, ug pagpanag-iya sa armas ug uban pang hinagiban nga walay awtorisasyon. Lakip usab sa ginadili ang pagkuha og bodyguard o security personnel nga walay akreditasyon gikan sa COMELEC.
Gikan Enero 12 hangtod Mayo 18, 2025, nakatala ang PRO7 og 397 ka kaso sa paglapas sa gun ban. Kini miresulta sa 407 ka mga nadakpan ug pagkasakmit sa 424 ka armas, lakip na ang 407 ka small arms, 3 ka light weapons, 3 ka replica o improvised firearms, 3 ka eksplosibo, ug 1,206 ka bala.
Ang mga kalampusan nakab-ot pinaagi sa mga checkpoint sa COMELEC, police patrol, pagresponde sa mga insidente, ug anti-illegal drug operations.
Gi-awhag sa PRO7 ang katawhan nga ipahibalo dayon sa kapulisan kung aduna silay masaksihan nga mga kalapasan sa gun ban o bisan unsang kadudahang lihok.
Ang gun ban enforcement kabahin sa nasyonal nga paningkamot nga mapadayon ang kalinaw ug seguridad sa tibuok election period, nga opisyal nga matapos sa Hunyo 12, 2025.
Source: PRO7-PIO
I via Renante Socia Lada