Usa ka lapad ug hugot nga operasyon ang gihimo sa Cebu City Police Office (CCPO) uban sa mga kauban nga ahensya sulod sa pito ka gabii, gikan Mayo 12 hangtod Mayo 18, 2025, ubos sa OPLAN BULABOG ug OPLAN BAKAL-SITA. Tumong niini ang pagpatuman sa mga lokal nga ordinansa ug pagpalig-on sa kaluwasan sa komunidad sa tanang 80 ka barangay sa syudad.
Gipangulohan ang operasyon ni CCPO Acting City Director PCOL Enrico E. Figueroa uban sa suporta ni Police Regional Office 7 Director PBGEN Redrico A. Maranan. Apil sa kalihokan ang tanang police stations sa dakbayan, kauban ang mga espesyal nga unit ug force multipliers gikan sa lokal nga kagamhanan.
Sa tibuok kalihokan, 2,770 ka establisimento ang na-inspeksyon, samtang 1,159 ka individual ang nasusi. Usa sa labing dakong kalampusan sa operasyon mao ang pagluwas sa 264 ka mga minor de edad nga gisupak ang curfew ordinance. Gawas pa niini, tulo ka individual ang gitikitan tungod sa kalapasan sa mga ordinansa, lakip na ang pagpanigarilyo sa pampublikong lugar.
Gipasabot ni PBGEN Maranan ang importansya sa presensya sa kapulisan ilabina sa mga lugar nga taas ang krimen. Gihimug-atan usab niya nga ang kooperasyon sa mga kauban nga ahensya ug komunidad mao’y yawe aron mapalig-on ang kampanya batok sa krimen ug masiguro ang kaluwasan sa katawhan.
Source: CCPO
I via Renante Socia Lada