Gidawat sa Cebu Police Provincial Office (CPPO), ubos sa pagpangulo ni PCOL Abubakar Udang Mangelen Jr., ang Inspection, Assessment, Monitoring, and Evaluation (IAME) team sa National Police Commission (NAPOLCOM) Regional Office 7 kagahapon Hulyo 20, 2026. Gipangulohan ang grupo ni Regional Director Atty. Maximo T. Lasaca ug Chief of the Inspection Division Atty. Giovani J. Bravo. Mitambong usab pinaagi sa Zoom ang mga hepe sa 50 ka municipal ug component city police stations sa probinsya.
Sa iyang mensahe, giingon ni Director Lasaca nga ang inspeksyon dili lang aron tan-awon kung nasunod ba ang mga lagda, kondili aron masiguro nga epektibo ang serbisyo sa kapulisan ug makatubag sa panginahanglan sa komunidad. Giingon usab niya nga ang pagsusi makatabang sa pagpalig-on sa kalinaw ug kahapsay, pagpakunhod sa kriminalidad, ug pagpalambo sa kaluwasan sa publiko.
Gidasig usab ni Lasaca ang kapulisan nga ipadayon ang paggamit sa modernong teknolohiya, pagpalambo sa mga polisiya, ug pagpalig-on sa kooperasyon sa ubang ahensya. Matod pa niya, ang mga kakulangan nga makita sa inspeksyon angay gamiton isip oportunidad aron mapauswag pa ang sistema ug mas mapalambo ang serbisyo sa publiko.
Samtang si PCOL Mangelen Jr. mipasalig nga ang CPPO magpadayon sa paghatag og propesyonal, matinud-anon, ug responsable nga serbisyo.
Matod pa niya, ang inspeksyon sa NAPOLCOM usa ka maayong higayon aron mas mapalig-on ang kapasidad sa kapulisan ug masiguro nga ang matag pulis magpadayon sa pag-alagad sa komunidad ug pagtuman sa balaod.
I via Renante Socia Lada