Ang Police Regional Office 7 (PRO7) naghatag og mga bag-ong sakyanan ug lain-laing kagamitan nga nagkantidad og ₱43 milyones sa Cebu Police Provincial Office (CPPO).
Tumong niini nga mapalig-on ang katakos sa kapulisan sa mas paspas ug episyenteng pagresponde sa mga insidente sa tibuok lalawigan sa Cebu.
Sa turnover ceremony, nadawat sa CPPO ang 10 ka Toyota Hilux patrol vehicles, 8 ka Toyota Innova, 4 ka Honda dirt bikes (150cc), daghang ligid ug 51 ka desktop ug laptop computers. Dugang pa, ang Probinsya sa Cebu nitunol usab og 4 ka Transalp 750 motorcycles nga gamiton ilabi na sa lisod maabot nga mga lugar.
Matod sa PRO7, dako kaayong tabang ang mga bag-ong mobility ug kagamitan aron mapadaghan ang presensya sa kapulisan sa mga syudad, barangay, ug kabukiran. Tungod niini, mas mapugngan ang krimen ug mas masaligan ang serbisyo sa kapulisan sa katawhan.
Gipasiugda ni PRO7 Regional Director PBGEN Redrico A. Maranan nga ang mga kagamitan gipamalit gamit ang pondo sa katawhan, busa angay kining gamiton sa disiplina, integridad, ug husto nga paagi.
Iyang giila usab ang suporta ni Gobernadora Pamela S. Baricuatro ug sa mga lokal nga lider, ug giingon nga mas lig-on ang kalinaw kung magkahiusa ang kapulisan ug lokal nga kagamhanan.
Sa maong kalihokan, gipasidunggan usab ang lima ka CPPO personnel nga nakapasar sa 2025 Bar Examination. Sumala ni PBGEN Maranan, importante nga ang gahum sa kapulisan gamiton sulod sa balaod. Samtang nag-andam ang Cebu sa Sinulog Festival ug sa ASEAN Summit, gisiguro sa PRO7 nga gamiton pag-ayo ang tanang kahimanan aron masiguro ang kaluwasan, kalinaw, ug kahapsay sa lalawigan.
Source: PRO7 PIO
I via Renante Socia Lada