Cebu: PRO7 GISIGURO ANG LIG-ON UG MALINAWON NGA PAGBISITA NI PRESIDENT MARCOS SA BALAMBAN, CEBU

Malampuson ug malinawon nga natuman ang opisyal nga pagbisita ni Presidente Ferdinand R. Marcos Jr. sa lungsod sa Balamban, Cebu niadtong Hulyo 15, 2026, human masiguro sa Police Regional Office 7 (PRO7) ang hugot ug hapsay nga seguridad sa tibuok kalihokan.
Sa pakigtambayayong sa PNP National Headquarters, lokal nga lider, Armed Forces of the Philippines, ug uban pang ahensya sa gobyerno, nagdeploy ang PRO7 og igo nga gidaghanon sa kapulisan aron bantayan ang tanang lugar ug agianan nga giagian sa Presidente. Gipatuman ang mga security measures sa wala pa, atol, ug human sa iyang mga kalihokan.
Gibantayan sa kapulisan ang mga venue, kadalanan, ug kritikal nga mga lugar aron masiguro ang hapsay nga pagdumala sa trapiko, kahapsay sa panon sa katawhan, ug kaluwasan sa tanang mitambong. Natapos ang operasyon nga walay insidente ug malinawon nga napauli ang mga pwersa nga gi-deploy.
Matod ni PRO7 Regional Director PBGen Redrico A. Maranan, tumong sa operasyon ang paghimo og luwas ug malinawon nga palibot aron hapsay nga matuman sa Presidente ang iyang mga kalihokan ug dili masamok ang adlaw-adlaw nga kalihokan sa mga residente sa Balamban.
Gipasalamatan usab ni PBGen Maranan ang tabang sa lokal nga pangulohan ug ang kooperasyon sa katawhan, nga dako kaayong tabang aron magmalampuson ang maong pagbisita. Padayon, matod pa sa PRO7, ang ilang paningkamot sa paghatag og kasaligan nga seguridad sa mga lider sa nasud ug dagkong kalihokan sa Central Visayas, uban ang propesyonalismo ug respeto sa publiko.
Source: PRO7 PIO
I via Renante Socia Lada