Sa pagselebrar sa ika-33 nga National Children’s Month, naglusad ang Police Regional Office 7 (PRO7), uban sa Kaisangbisig PNPA Class of 2009, og usa ka makapahupay ug makapadasig nga outreach program didto sa Everlasting Hope Childhood Cancer Mission sa Francesca Village, Happy Valley, Guadalupe, Cebu City niadtong Nobyembre 20, 2025.
Ang Everlasting Hope usa ka dakong tabang alang sa mga bata nga nagpadayon sa ilang cancer treatment. Naghatag kini og puy-anan, medikal nga suporta, transportation, ug espiritwal ug emosyonal nga pag-atiman alang sa mga pasyente ug ilang pamilya.
Pinaagi sa Regional Community Affairs and Development Division (RCADD) ug Kaisangbisig Class of 2009, nakigdugtong ang PRO7 sa kapin baynte ka mga bata nga nag-edad 2 hangtod 17. Gihatagan sila og kalipay pinaagi sa pag-awit, sayaw, storytelling, ug lain-laing dula uban sa ilang ginikanan, mga guardian, ug PNP personnel. Misayaw usab ang PRO7 dancers para sa espesyal nilang pasundayag nga gihalad para sa mga bata.
Mainiton nga gidawat ang grupo nila Mr. Patrick Ian Jumamil, National Director sa Everlasting Hope, ug sa staff sa center. Mitunol usab og mensahe sa pagdasig sila PMAJ Agapito M. Duque, Class President sa Kaisangbisig 2009, ug PLTCOL Mia Rose Burlat, Deputy Chief sa RCADD.
Usa sa highlight nga gihimo sa programa mao ang pagtuman sa mga personal wish list sa mga bata, nga nakahatag kanila og dakong kahimuot. Nakadawat usab ang mga bata og loot bags, fruit baskets, vitamins, ug stuffed toys, samtang ang Everlasting Hope nakadawat og duha ka sako (25 kilos matag usa) nga bugas, mga kahon sa bottled water, mga kutson, ug kape.
Nagpakita kini nga kalihokan sa tinuoray nga pagpakabana sa PRO7 sa paghatag paglaum ug paglig-on sa kasingkasing sa mga bata nga nag-atubang og lisud nga kahimtang sa kinabuhi, labi na samtang nagkadool ang Pasko.
“As we celebrate National Children’s Month and approach Christmas, may we always choose compassion and kindness in serving our communities. We were reminded that courage comes in the smallest and bravest forms. These children face battles no one their age should, yet they continue to smile with hope, ” segon ni PBGen Redrico A Maranan, PRO7 Director.
Kini nga outreach nagsilbi nga sayo nga regalo sa Pasko para sa mga bata ug nagpalig-on sa komitment sa PRO7 sa pagpalapad sa paglaum, pag-atiman, ug pagkahiusa sa Central Visayas.
Source: PRO7 PIO
I via Renante Socia Lada