Miuban si Cebu Gov. Pamela Baricuatro kang Presidente Ferdinand Marcos Jr. sa paglusad sa “Oplan Kontra Baha: Metro Cebu Waterways Clearing and Cleaning Operations” niadtong Nobyembre 21, 2025 sa Mahiga Creek duol sa M. Logarta Bridge, tunga-tunga sa mga siyudad sa Mandaue ug Cebu.
Gikan sa unang pagpatuman niini sa Metro Manila, ang inisyatiba naghiusa sa mga ahensya sa nasyonal nga gobyerno, mga lokal nga yunit (LGUs), ug pribadong sektor aron limpyohan ang mga suba, sapa, ug drainage systems nga dugay nang nabara sa lapok ug basura. Tumong niini nga malikayan ang grabe nga pagbaha panahon sa kusog nga ulan.
Mitambong usab sa seremonya sila Cebu City Mayor Nestor Archival, Mandaue City Mayor Jonkie Ouano, ug DPWH Secretary Vince Dizon.
Gipahibalo sa Presidente nga molungtad og siyam ka bulan ang clearing operations. Gipatabang ang 287 ka heavy equipment units ug daghang personnel gikan sa DPWH, LGUs, ug pribadong sector aron mapadagan ang operasyon.
Gitan-aw ni Marcos Jr. ang nagpadayon nga trabaho sa Mahiga Creek sama sa dredging, pagkuha sa basura, pag-demolish sa iligal nga istruktura, ug ubang kalihukan nga nagtinguha nga mabalik ang natural nga agos sa tubig ug maminusan ang peligro sa pagbaha.
Ang Mahiga Creek kabahin sa kapin 12-kilometro nga Subangdaku–Mahiga River system, usa ka nag-unang agianan sa tubig nga misulod sa urban Cebu City ug kasikbit nga barangay. Kanunay kini mobaha panahon sa kusog nga ulan tungod sa lapok ug nahugpong nga basura, ilabi na sa palibot sa Subangdaku Bridge.
Ilawom sa DPWH Region 7, nagsugod usab ang dinungang paglimpyo sa ubang dagkong waterways sama sa Butuanon River, Subangdaku River, Kinalumsan River, Guadalupe River, Mananga River, Cotcot River, ug ang daplin sa Cansaga Bridge.
Gipahibalo usab sa Presidente ang pagtukod sa tulo hangtod lima ka Sabo dams sa Cebu aron makontrol ang kusog nga tubig panahon sa flash floods. Kini nga mga dam nga kasagarang gitukod sa bukirang dapit makatabang sa pagdakop sa sediment, debris ug bato, paghinay sa agos sa tubig, ug pagpanalipod sa ubos nga komunidad ug imprastruktura.
Source: Cebu Province PIO
I via Renante Socia Lada