Gidayeg ni PBGen. Redrico A. Maranan, Regional Director sa Police Regional Office 7 (PRO7), ang Tourist Police Unit (TPU) tungod sa ilang paspas ug propesyonal nga pagresponde sa duha ka insidente nga nalambigit ang mga langyaw nga turista sa habagatang Sugbo.
Niadtong Pebrero 17, 2026, dali nga mitabang ang mga sakop sa TPU nga naka-assign sa Alegria Tourist Assistance Desk sa usa ka 28-anyos nga lalaki nga turista gikan sa Netherlands nga naangol samtang nag-canyoneering sa Barangay Compostela, Alegria.
Gihatagan dayon siya og first aid, gipahigda sa stretcher uban sa tabang sa mga saksi, ug nakig-coordinate sa Municipal Disaster Risk Reduction and Management Office (MDRRMO) sa Alegria. Dali siyang gidala sa Badian District Hospital alang sa hustong pagpa-check up ug pagtambal.
Samtang niadtong Pebrero 27, 2026, mitabang usab ang Tourist Police nga naka-duty sa Tumalog Falls Tourist Assistance Desk sa usa ka laing langyaw nga turista nga naangol gamay human madakin-as sa basa nga dapit samtang migawas sa Tumalog Falls sa Barangay Tumalog, Oslob.
Uban sa Barangay Health Worker (BHW), ilang gihimo ang unang pagtambal didto mismo sa lugar aron maseguro ang kahimtang ug kaluwasan sa turista.
Sumala ni PBGen Maranan, nagpakita kini sa ka-andam, pagbantay, ug dedikasyon sa Tourist Police nga nagserbisyo sa mga dagkong tourist destinations sa rehiyon.
Matud pa niya, padayon nga palig-onon sa PRO7 ang koordinasyon sa mga lokal nga panggamhanan ug partner agencies aron maseguro nga luwas ug malinawon ang pagbisita sa mga turista sa Central Visayas.
Source: PRO7
I via Renante Socia Lada