Gipahimutang sa Police Regional Office 7 (PRO7) ang tanang yunit niini sa mas taas nga alerto samtang gipadayon ang hugot nga seguridad ilawom sa “Ligtas Paskuhan 2025” nga kampanya sa Philippine National Police.
Pinaagi sa mando ni PNP Acting Chief, PLTGEN Jose Melencio C. Nartatez Jr., gipadaghan sa PRO7 ang police visibility, mga pagpatrolya, ug mga checkpoint sa tibuok Central Visayas aron mapugngan ang krimen ug masiguro ang malinawon ug luwas nga pagsaulog sa Pasko ug Bag-ong Tuig.
Matod ni PRO7 Regional Director PBGEN Redrico A. Maranan, istrikto nilang ipatuman ang balaod karong holiday season aron mapanalipdan ang publiko gikan sa tanang matang sa krimen.
“This holiday season, we are deploying our personnel aggressively yet responsibly to ensure that every family in Central Visayas can celebrate Christmas and the New Year in peace and security,” segon ni PBGEN Maranan.
Bisan pa nga walay nakita nga hulga sa seguridad karon, nagpabilin gihapon nga alerto ang PRO7 ug wala kumpyansa.
Gisugo na ang mga unit commanders nga lig-unon pa gyud ang police presence sa mga pantalan, airport, simbahan, merkado, malls, kadalanan, transport terminals, ug uban pang daghang tawo nga lugar.
Gipadagan na usab ang dugang foot patrols, mobile patrols, ug chokepoints aron mapugngan ang pagpangawat, panulis, aksidente sa trapiko, ug ubang krimen nga kasagarang motaas sa holiday season. Sa pagdagsa sa mga pasahero ug mga OFWs nga mopauli, gibutang na ang mga police assistance desks sa Mactan-Cebu International Airport, mga pantalan, ug dagkong bus terminals aron motabang dayon sa crowd control, lost-and-found, ug emerhensiya.
Isip andam sa Bag-ong Tuig, istrikto nga ipatuman sa PRO7 ang mga lagda sa paggamit sa firecrackers ug pyrotechnics ug hugot nga pagdili sa indiscriminate firing. Nagpadayon ang koordinasyon sa LGUs aron ma-regulate ang firecracker zones ug masiguro ang kaluwasan sa publiko.
Nagpadayon usab ang PRO7 sa pakighiusa sa LGUs, barangay, transport groups, negosyo, ug mga security agencies aron mapalig-on ang intelligence sharing, traffic management, ug paspas nga emergency response.
Gihangyo sab ni PBGEN Maranan ang publiko nga magmatngon ug magtinabangay.
“Public safety is a shared responsibility. By reporting suspicious activities and observing safety regulations, we help protect not only ourselves but our entire community,” dugang niya.
Sa padayon nga pag-implementar sa Ligtas Paskuhan 2025, gisiguro sa PRO7 nga tibuok ang ilang pagpanalipod sa kinabuhi, kabtangan, ug kalinaw sa Central Visayas karong holiday season.
Source: PRO7 PIO
I via Renante Socia Lada