Malampusong natuman sa Police Regional Office 7 (PRO7) ubos sa pagpangulo ni PBGEN Redrico A. Maranan ang operasyon sa seguridad atol sa pagbisita ni President Ferdinand R. Marcos Jr. sa probinsya sa Cebu kagahapong adlawa, Nobyembre 7, 2025. Ang pagbisita gihimo aron tan-awon ang mga lugar nga grabe naapektuhan sa Bagyong “Tino.”
Tungod sa panaghiusa sa kapulisan, lokal nga kagamhanan, ug uban pang law enforcement agencies, hapsay ug malinawon ang tibuok lakang sa operasyon. Gitabonan sa seguridad ang tanang agianan, lugar sa kalihokan, ug mga destinasyon sa Presidente. Wala’y natala nga insidente sa seguridad atol sa tibuok adlaw.
Gikan sa iyang aerial inspection sa norte ug sur nga bahin sa Cebu, gitan-aw ni Presidente Marcos Jr. ang kadaot nga gidala sa bagyo ug ang nagpadayon nga relief operations. Dayon, mibisita siya sa evacuation center sa Barangay Cotcot, Liloan, diin iyang personal nga nakig-estorya sa mga evacuee ug gipanghatagan og tabang ang mga naapektuhan nga pamilya.
Sunod niyang giinspeksyon ang Mananga Bridge sa Barangay San Isidro, Lawaan II, Talisay City, nga grabe usab nadaot sa baha, ug mibisita sa Talisay Sports Academy Evacuation Center diin 276 ka pamilya o 1,110 ka indibidwal ang kasamtangang nagpuyo. Didto, iyang gitutukan ang pag-apod-apod sa mga family food packs nga gipasiugda sa DSWD.
Nahuman ang iyang pagbisita sa usa ka situation briefing sa Cebu Provincial Capitol, uban ang mga lokal nga opisyal ug ahensya sa gobyerno, aron hisgutan ang epekto sa bagyo ug ang padayong mga lakang sa pagbangon sa probinsya.
Sa iyang pahayag, giingon ni PBGEN Maranan nga ang kalinaw ug kalampusan sa pagbisita nagpakita sa disiplina, koordinasyon, ug dedikasyon sa mga sakop sa PRO7.
“The smooth and secure conduct of the President’s visit reflects the professionalism, coordination, and commitment of our men and women on the ground. Team PRO7 once again demonstrated discipline and dedication in ensuring the safety of the President and the public,” segon ni PBGen Maranan.
Ang kalampusan sa operasyon nagpakita sa ka-andam ug kapasidad sa PRO7 sa pagserbisyo sa katawhan ug sa pagpanalipod sa kalinaw, ilabi na sa panahon sa kalisdanan.
Source: PRO7 PIO
I via Renante Socia Lada