Personal nga mibisita si President Ferdinand R. Marcos Jr. sa Liloan, Cebu niadtong Biyernes aron tan-awon ug bantayan ang padayong relief ug recovery operations human sa kadaot nga gidala sa Bagyong Tino.
Ang Liloan usa sa mga lugar nga grabe kaayong naapektuhan sa bagyo, diin daghang gidala og kadaot ug kaswalti ang natala. Usa sa mga gibisita sa Presidente mao ang Tiltilon Elementary School sa Barangay Cotcot, nga karon nagserbisyo isip evacuation center alang sa 126 ka pamilya o 509 ka indibidwal.
Atol sa iyang pagbisita, personal nga nag-apod-apod si Presidente Marcos Jr. og family food packs, health kits, hygiene kits, ug sleeping kits gikan sa Department of Social Welfare and Development (DSWD). Gihatagan usab sa DSWD og init nga pagkaon ang mga evacuee nga nagpabilin sa eskwelahan.
Aron masiguro ang kaluwasan ug kahimsog sa mga evacuee, ang Department of Health (DOH) – Central Visayas nagpatuman og rapid health assessment sa evacuation site. Sumala ni Rolly Villarin, Development Management Officer sa DOH-7, naghatag ang ahensya og libre nga medical check-up ug tambal, lakip na ang maintenance medicines, antibiotics, doxycycline (para sa leptospirosis prevention), ug anti-tetanus vaccines alang sa mga tawo nga adunay samad.
Gisiguro usab sa DOH nga gihatagan og routine vaccination ang mga bata aron malikayan ang posible nga paglutaw sa mga sakit. Gipahigayon usab nila ang Water, Sanitation, and Hygiene (WASH) assessment aron matino nga luwas ang tubig nga gigamit sa mga evacuee sa pag-inom ug uban pang gamit.
Gimonitor usab sa DOH ang mga bata, mabdos, ug mga inahan nga nagpasuso, aron masiguro nga sakto ang nutrisyon ug gatas sa mga bata samtang sila anaa sa evacuation center.
Human sa iyang pagbisita sa Liloan, miadto usab ang Presidente sa Talisay Sports Academy sa Talisay City, diin nagpadayon siya sa pag-apod-apod og tabang alang sa mga naapektuhang residente.
Ang pangulo misaad nga mutubang goberno sa tanang apektado ug biktima sa Bagyo Tino.
Source: PCO
I via Renante Socia Lada