Nadakpan sa mga operatiba sa Naga City Police Station ang usa ka babaye nga negosyante nga giila isip “Other Wanted Person” niadtong Pebrero 19, 2026 sa Barangay Cogon Ramos, Cebu City.
Ang nadakpan mao si alias “Obet,” 53 anyos, single, residente sa Barangay Linao-Lipata, Minglanilla, Cebu. Ang operasyon gihimo sa hiniusang pwersa sa Intelligence Unit, Drug Enforcement Unit (DEU), ug Tracker Team sa City of Naga Police Station.
Gibase ang pagdakop sa usa ka Warrant of Arrest nga gi-isyu ni Hon. Dennis Creus Larrobis, Presiding Judge sa Regional Trial Court Branch 76 sa City of Naga, Cebu, tungod sa kasong Libel ubos sa Article 353 sa Revised Penal Code. Gitakda sa korte ang piyansa nga ₱30,000 alang sa temporaryong kagawasan sa akusado.
Sumala sa rekord, ang kaso nagsugod niadtong Marso 26, 2025 sa Barangay Tuyan, City of Naga, diin giingong nakabutyag ang suspek og makadaot nga mga pulong batok sa complainant atol sa usa ka panaglalis. Ang isyu una nga gidala sa Lupon Tagapamayapa apan wala magkasabot, busa gipadayon ang pormal nga pagsaka sa kaso. Human mahibalo sa reklamo, miadto ang suspek sa Cebu City.
Si PCol. Abubakar Udang Mangelen Jr., Provincial Director sa Cebu Police Provincial Office, midayeg sa paspas nga aksyon sa mga operatiba ug mipasalig nga magpadayon ang kampanya batok sa mga wanted persons aron mapalig-on ang kalinaw ug kahapsay sa probinsya.
Source: CPPO
I via Renante Socia Lada