Gipasiugda sa Police Regional Office 7 (PRO-7) ang kamahinungdanon sa kaluwasan sulod sa mga eskwelahan pinaagi sa aktibong presensya sa kapulisan, kooperasyon sa komunidad, ug responsableng pamatasan sa mga estudyante aron malikayan ang mga insidente sa kapintas sa mga tunghaan.
Ang maong pahimangno sa PRO-7 miabot human sa makalilisang nga insidente sa San Jose National High School sa Tacloban City diin upat ka mga estudyante ang namatay ug daghan pa ang nasamdan tungod sa pagpamusil nga nahitabo sulod sa eskwelahan kagahapon Hunyo 22. Nagpadayon karon ang imbestigasyon sa mga awtoridad aron masuta ang tibuok hinungdan sa nahitabong trahedya.
Matud sa PRO-7, ang kaluwasan sa mga estudyante dili lamang responsibilidad sa kapulisan kondili sa tibuok komunidad. Gikinahanglan ang panagtinabangay sa mga ginikanan, magtutudlo, lokal nga panggamhanan, ug mga kabatan-onan aron mapadayon ang malinawon ug luwas nga palibot sa pagkat-on.
Dugang pa sa kapulisan, importante usab nga mahimong alerto ug responsable ang mga estudyante pinaagi sa pagsunod sa mga lagda sa eskwelahan ug pagreport dayon sa mga kahimtang nga mahimong hinungdan sa peligro o kapintas.
Nagpasalig ang PRO-7 nga magpadayon sila sa pagpalig-on sa seguridad sa mga eskwelahan aron masiguro nga ang matag bata adunay luwas nga lugar diin sila makat-on, motubo, ug makab-ot ang ilang mga damgo. Sumala sa kapulisan, pinaagi sa panaghiusa sa tanang sektor, mahimong matukod ang mas luwas nga mga eskwelahan ug mas lig-on nga mga komunidad.
I via Renante Socia Lada