Gipalig-on sa Police Regional Office 7 (PRO7) ang implementasyon sa Oplan Bulabog ug Oplan Bakal Sita sa tibuok Central Visayas, subay sa direktiba ni DILG Sec. Juanito Victor Remulla, sa Department of the Interior and Local Government (DILG), aron mas mapahugot ang pagpatuman sa kalinaw ug kahapsay ilawom sa Safe Cities initiative sa nasudnong gobyerno.
Ubos sa Oplan Bulabog, gipakusgan sa kapulisan ang ilang operasyon batok sa gagmayng kalapasan ug kagubot sa komunidad sama sa pag-inom og ilimnong makahubog sa publikong lugar, ilegal nga sugal sa dalan sama sa hantak, saba nga videoke, catcalling, ug uban pang binuhatan nga makasamok sa kalinaw sa katawhan. Samtang ang Oplan Bakal Sita padayon nga ipatuman pinaagi sa mga checkpoint aron mapugngan ang paglusot sa mga ilegal nga armas, ug uban pang kontrabando nga mahimong gamiton sa krimen.
Sumala ni PBGEN. Redrico A. Maranan, Regional Director sa PRO7, ang pagpalig-on sa maong mga operasyon nagpakita sa lig-on nga paningkamot sa Philippine National Police (PNP) sa pagsuporta sa mga direktiba sa gobyerno aron mapalambo ang disiplina, kaluwasan, ug kahapsay sa mga komunidad.
Matud pa ni Maranan, magpadayon ang kapulisan sa suod nga koordinasyon uban sa mga lokal nga panggamhanan ug mga opisyal sa barangay aron masiguro nga magpabiling malinawon, organisado, ug luwas ang matag komunidad alang sa publiko.
Dugang pa niya, palig-onon usab ang presensya sa kapulisan sa mga komunidad, ilabi na sa mga publikong lugar ug duol sa mga eskwelahan, isip kabahin sa mas lapad nga kampanya batok sa kriminalidad ug aron musaka ang pagbati sa seguridad sa katawhan.
Gipasiguro sa PRO7 nga magpadayon sila sa pakigtambayayong sa mga lokal nga panggamhanan ug barangay aron hingpit nga mapatuman ang Safe Cities initiative ug mapadayon ang kalinaw ug kahapsay sa tibuok Central Visayas.
Source: PRO7 PIO
I via Renante Socia Lada