Nadakpan sa Toledo City Police Station ang usa ka 20 anyos nga lalaki tungod sa paglapas sa Republic Act 10591, human makadawat og report gikan sa usa ka residente bahin sa usa ka armadong indibidwal sa Barangay Luray 2, Toledo City.
Sumala sa kapulisan, nahitabo ang operasyon alas 9:55 sa gabii niadtong Abril 7, 2026. Daling mitubag ang mga operatiba gikan sa Intelligence and Special Drugs Enforcement Unit (INTEL/SDEU) sa maong police station ug ilang nailhan ang suspetsado nga gitawag lang sa alyas nga “Tian,” usa ka walay trabaho ug residente sa maong barangay.
Nasakpan sa akto ang suspetsado nga nagdala og walay lisensya nga pusil. Sa dihang gi-search, nakuha gikan kaniya ang usa ka caliber 9mm Deringer revolver ug duha ka buok bala sa 9mm nga gilista isip ebidensya.
Human sa pagdakop, gidala ang suspetsado sa Toledo City Hospital alang sa medical examination ug gi-deklarar nga himsog ug angay ibutang sa kustodiya. Sa pagkakaron, anaa na siya sa kustodiya sa Toledo City Police Station samtang gihulat ang pagpasaka sa hustong kaso batok kaniya.
Si PCOL Abubakar Udang Mangelen Jr., Provincial Director sa Cebu Police Provincial Office, mipasidungog sa maong operasyon. Matud pa niya, nagpakita kini sa kaandam sa kapulisan ug sa dako nga papel sa kooperasyon sa komunidad sa pagpugong sa pagkatag sa ilegal nga armas.
Gipahinumduman usab sa kapulisan ang publiko nga magpabiling alerto ug mag-report dayon sa bisan unsang kadudahang lihok aron mapadayon ang kalinaw ug kaluwasan sa komunidad.
Source: CPPO
I via Renante Socia Lada