Gipakusgan sa Police Regional Office 7 (PRO7) ang seguridad sa turismo sa Panglao pinaagi sa paglusad sa R.I.D.E. Patrol sa Bohol Tourist Police Unit (BTPU) niadtong Enero 12, 2026, isip pag-andam sa umaabot nga ASEAN 2026 ug sa padayon nga pagdagsa sa mga langyaw ug lokal nga turista.
Gipangulohan ni PCPT Janice C. Parcon, AC, BTPU ang maong pagpatrolya nga gilangkuban sa 88 ka Tourist Police nga gipakatap sa nagkadaiyang lugar sa Bohol. Andam silang motubag dayon sa mga emerhensiya aron masiguro ang kaluwasan sa mga turista ug mga residente.
Ang R.I.D.E. nagpasabot og Rescue, Intervention, and Defense in Emergencies ug kabahin sa gipakusog nga Oplan “Bantay Turista.” Gamit ang All-Terrain Vehicles (ATVs), mas dali na karon maka-patrolya ang mga pulis sa mga baybayon, gagmay nga agianan ug hilit nga mga resort nga lisod maabot sa ordinaryong patrol vehicles.
Tungod niini, mas paspas na ang pagresponde sa mga insidente, mas halapad ang mabantayan nga lugar, ug mas mapugngan ang krimen, ilabi na sa mga lugar nga daghang turista ug sa mga hilit nga daplin sa baybayon.
Sumala ni PBGEN Redrico A. Maranan, Regional Director sa PRO7, importante kaayo ang maong inisyatiba aron masiguro ang kahapsay ug kaluwasan sa rehiyon. Miingon siya nga samtang nag-andam ang Central Visayas sa pagdawat sa mga turista ug internasyonal nga delegasyon, kinahanglan ang klaro, flexible ug paspas nga seguridad.
Ang R.I.D.E. Patrol nagpakita sa pasalig sa PRO7 nga panalipdan ang mga bisita ug mapadayon ang pagsalig sa Panglao isip usa ka world-class ug luwas nga destinasyon. Kini usab nagsuporta sa padayon nga pagtubo sa turismo ug kalamboan sa lokal nga komunidad.
Source: PRO7 PIO
I via Renante Socia Lada