Sa kapin semana nga search and retrieval operation sa trahedya sa Binaliw Landfill. Misaka na sa 26 ka tawo ang kumpirmadong nakalas sumala sa report alas 8:06 sa gabii sa Huwebes, Enero 15. Padayon ang operasyon sa search and retrieval sa lugar aron pangitaon ang ubang posible pang biktima.
Nadugang ang ihap sa mga namatay human naukay ang lawas sa usa ka babaye gabii, sumala sa mga otoridad nga nagdumala sa operasyon. Ang maong pagkadiskubre mipabug-at pag-usab sa kasubo nga gihatag sa maong trahedya.
Sa kasamtangan, 10 ka tawo ang padayon pang gipangita, samtang 18 ang naangol ug gidala sa nagkalain-laing tambalanan alang sa pagtambal ug obserbasyon. Nagpadayon ang pag-monitor sa kahimtangan sa mga nasamdan.
Nagtinabangay ang mga rescuers, kapulisan, bumbero, ug lokal nga kagamhanan sa walay hunong nga operasyon bisan pa sa kakapoy ug kalisod sa kahimtangan sa lugar.
Gipalig-on usab ang mga safety measures aron malikayan ang dugang peligro sa mga nagresponde.
Padayon nga gihangyo sa mga otoridad ang publiko nga mag-ampo alang sa mga biktima ug motahod sa kahimtangan sa mga pamilya nga naapektuhan sa trahedya, samtang nagpadayon ang imbestigasyon aron matino ang tinuod nga hinungdan sa insidente.