Nakadawat og mahinungdanong tabang ang Police Regional Office 7 (PRO7) gikan sa Police Regional Office Cordillera Administrative Region (PRO-CAR) ilawom sa pagdumala ni PBGEN Ericson D. Dilag, karong Nobyembre 8, 2025. Ang mga donasyon naglakip og 6.8 toneladang utanon, 52 ka sako nga bugas, ug ubang mga kinahanglanon aron matabangan ang mga pulis ug komunidad nga apektado sa bagyong “Tino” sa Sugbo.
Ang maong kalihukan nagpakita sa tinuod nga lihok sa panaghiusa ug pagtinabangay sa sulod sa Philippine National Police (PNP), labi na sa mga biktima sa kalamidad.
Sa Nobyembre 7, gihimo sa PRO-CAR ang usa ka donation drive sa Camp Major Bado Dangwa sa La Trinidad, Benguet, uban ang suporta sa Office of Civil Defense–CAR, mga pulis sa Benguet, ug mga boluntaryo gikan sa mga eskwelahan, kooperatiba, ug pribadong sektor. Ang Baguio City Police Office usab misuporta pinaagi sa pagkolekta og dugang tabang gikan sa mga grupo sa siyudad.
Pagkabuntag sa Nobyembre 8, gitransport sa RMFB15 ang mga goods padulong sa Clark Air Base sa Pampanga aron i-airlift sa Cebu gamit ang eroplano sa Philippine Air Force. Ang mga donasyon naglakip og bugas, tubig, pagkaon, sinina, ug mga materyales sa konstruksyon. Pag-abot sa Mactan Air Base, personal kini nga gidawat ni PCOL Kimberly Molitas sa PRO7 uban sa tabang sa Air Force.
Nagpasalamat si PBGEN Redrico A. Maranan, Regional Director sa PRO7, sa PRO-CAR sa ilang kalooy ug suporta.
Ang maong panaghiusa nagpakita nga bisan unsang kalisdanan, magpabilin ang PNP nga nagtinabangay aron makatabang, makabangon, ug makahatag paglaum sa mga Pilipino.
Source: PRO7 PIO
I via Renante Socia Lada