Padayon ang paningkamot sa Cebu Provincial Government aron matabangan ug mabalik ang normal nga kahimtang sa kinabuhi sa kapin 220,000 ka mga Sugbuanon nga naapektuhan sa Bagyong Tino.
Base sa pinakabag-ong SITREP Update No. 11 sa Provincial Disaster Risk Reduction and Management Office (PDRRMO), nagpunting karon ang kapitolyo sa pag-ayo sa mga nag-unang serbisyo sama sa kuryente, tubig, ug komunikasyon, samtang gipadayon usab ang paghatod sa relief goods sa mga pinakasentrong lugar nga grabe ang kadaot.
Matod sa mga Kapitolyo, prioridad karon ang mga pamilyang nawad-an og balay ug panginabuhi, ilabi na sa mga lungsod nga na grabihan sa kusog nga hangin ug baha nga gidala sa bagyo.
Ang mga rescue team ug volunteer groups padayon usab sa ilang operasyon aron masiguro nga makadawat og hinabang ang tanan nga naapektuhan.
Giingon sa Kapitolyo nga magpadayon ang ilang koordinasyon sa mga LGU ug national agencies aron mas paspas ang pagbangon sa Cebu gikan sa kadaot nga gidala ni Bagyong Tino.
Source: PDRRMO
I via Renante Socia Lada