Gipahibalo ni Police Brigadier General Roy B. Parena, Officer-In-Charge sa PRO-7, nga ang unang mga misa sa “Simbang Gabi” nilampos nga walay nahitabong mga insidente sa mga simbahan sa rehiyon sa Central Visayas.
Sa iyang pamahayag atol sa command conference, gibutyag ni PBGen Parena nga ang unang adlaw sa tradisyonal nga siyam ka adlaw nga Simbang Gabi milabay nga malinawon ug walay gi-report nga dakong insidente.
“Day 1 proceeded smoothly, and we are fully prepared for the remaining days leading to Christmas and New Year celebrations. Our comprehensive security plan is fully operational, with a primary focus on ensuring the safety and security of the Central Visayas community,” matod ni PBGen Parena.
Sumala sa report sa Regional Tactical Operations Center, walay nahipos nga mga seryosong insidente hangtod sa karon. Magpadayon usab ang PRO-7 sa pagmonitor ug maghatag og tukmang updates mahitungod sa kalinaw ug kahusay sa rehiyon.
Gipasiugda ni PBGen Parena ang kaimportante sa sayo nga panag kooperar tali sa mga opisyal sa simbahan ug lokal nga kagamhanan.
Gipasalamatan usab niya ang mga nagplano nga mahimong epektibo ang pag implementar sa mga lakang sa seguridad ug mapatuman ang mga lokal nga ordinansa aron mapreserba ang malinawon nga palibot panahon sa maong selebrasyon.
Giawhag usab niya ang mga unit commanders nga magpabilin nga alerto ug andam nga motubag kung adunay emerhensya.
Dugang pa, iyang gipadasig ang publiko nga makigtambayayong sa lokal nga mga otoridad pinaagi sa pagreport dayon sa bisan unsang kadudahang kalihukan o panghitabo. (Renante Socia Lada)
(Source: PRO-7 PIO)