Malampuson ang usa ka semana nga operasyon sa Police Regional Office 7 nga niresulta sa pagsakmit og iligal nga drogas nga nagkantidad og PhP54.1 milyon, armas, ug ang pagkasikop sa 319 ka nakalapas sa balaod sa rehiyon sa Central Visayas.
Sumala ni PBGen Roy B. Parena, Officer-In-Charge sa PRO-7, ang mga operasyon gihimo gikan Disyembre 13 hangtod 15, 2024, diin gipakita ang dedikasyon sa mga kapulisan aron mapugngan ang kriminalidad samtang nagkadool ang kapaskuhan.
7.96 ka kilo nga shabu ang nasakmit nga nagkantidad og PhP54,150,644. Nadakpan usab ang 104 ka drug suspek atol sa 86 ka anti-drug operations.
Nadakpan usab ang 110 ka mga suspetsado nga zugarol ug narekober ang PhP13,606.00 nga kwarta gikan sa pusta.
Nadakpan ang 5 ka indibidwal ug nakumpiska ang 80 ka armas ug bala.
Sa Wanted Persons nadakpan ang 100 ka mga suspetsado diin 14 niini giila nga most wanted.
Gipasalamatan ni PBGen Parena ang tanang police units sa ilang mga pagserbisyo aron mapalambo ang kahapsay ug kaluwasan sa rehiyon. Giawhag usab niya ang publiko nga magpabilin nga mabinantayon ug motabang sa pagreport sa bisan unsang kadudahang kalihukan aron mapadayon ang kalinaw sa panahon sa kapaskuhan.
“Our message is clear: We are dedicated to making Central Visayas safe for everyone. This success comes from the strong support of the community and other law enforcement agencies. Together, we are setting the standard for peace and order in the Central Visayas region,” segon ni PBGen Parena. (Renante Socia Lada)
(Source: PRO-7 PIO)