Mas gipakusgan pa sa Police Regional Office-7 (PRO-7) ang ilang kampanya batok sa ilegal nga armas human masakmit ang 1,685 ka armas ug madakpan ang 404 ka indibidwal sa unang tulo ka bulan sa 2025.
Matod sa PRO-7, ang maong mga operasyon kabahin sa ilang padayong paningkamot aron mapalig-on ang seguridad sa rehiyon, ilabina sa umaabot nga eleksyon. Ang ilang mga lakang naglakip sa mga estratehikong inisyatiba sa pagsakmit sa mga iligal nga armas ug pagpasiugda sa pagsunod sa gun ban nga gipahamtang sa Commission on Elections (Comelec).
Gikan sa Enero 1 hangtod Marso 31, 2025, nakahimo ang PRO-7 og 1,051 ka operasyon nga nagresulta sa pagkasakmit sa 1,685 ka armas, 26 ka eksplosibo, ug 2,302 ka bala. Pinaagi sa Oplan Katok, 584 ka operasyon ang napahigayon diin 615 ka armas ang boluntaryong gisurender ug gitago sa nagkadaiyang estasyon sa kapulisan.
Sumala ni PBGen Redrico Maranan, Regional Director sa PRO-7, ang maong operasyon resulta sa lig-on nga paningkamot sa kapulisan sa pagpakunhod sa krimen ug pagpugong sa kagubot nga may kalabotan sa mga pusil.
Dugang pa niya, ang padayong operasyon batok sa iligal nga armas kabahin sa ilang paningkamot sa pagpabilin sa kahapsay ug kalinaw sa Central Visayas aron masiguro ang kasaluwasan sa katawhan labi na sa umaabot eleksyon.
Source:PRO7-PIO
I via Renante Socia Lada