Walay undang ang gihimong operasyon sa Police Regional Office 7 (PRO7) batok sa tanang matang sa kriminalidad nga miresulta sa pagsakmit sa kapin ₱10.7 milyon nga kantidad sa iligal nga drogas ug pagdakop sa mga wanted persons sa rehiyon sulod lang sa usa ka semana, gikan Agosto 10 hangtod 16, 2025.
Base sa datos sa PRO7, adunay 121 ka anti-illegal drug operations nga gipahigayon nga mitultol sa pagdakop sa 148 ka indibidwal. Nakumpiskar usab ang 1,585.86 gramos nga shabu nga nagkantidad og ₱10,783,848. Dugang pa, 69 ka wanted persons ang nadakpan, diin 30 niini mao ang gilangkob sa most wanted criminals sa rehiyon, probinsya, lungsod, ug estasyon nga lebel.
Sa operasyon batok armas, 19 ang nadakpan ug nakuha ang 24 ka pusil ug 98 ka bala. Sa iligal gambling, 148 ka tawo ang nasikop ug nasakmit ang ₱4,927 nga pusta.
Matod ni PBGEN Redrico A. Maranan, dili mohunong ang PRO7 sa mga operasyon aron masiguro ang kalinaw ug seguridad sa Central Visayas. Iyang giingon nga ang matag kalampusan sa operasyon resulta sa kooperasyon sa komunidad ug ipadayun pa ang pagpangusog sa “5-Minute Response Strategy” ilawom sa pagpangulo ni PGEN Nicolas D. Torre III.
Source: PRO7-PIO
I via Renante Socia Lada