Gimandoan ni Cebu Gobernor Pamela Baricuatro si Santa Fe Mayor Ithamar Espinosa sa pagpahunong dayon sa pagtukod sa kontrobersyal nga Stria Hotel sa Bantayan Island tungod sa klarong paglapas sa balaod sa kalikupan. Ang direktiba gi-isyu pinaagi sa usa ka pormal nga suwat nga pinetsahan Agosto 18, 2025.
Sa maong kamanduan, gipahinumdoman ni Baricuatro si Espinosa sa posible nga legal nga sangputanan kon mapakyas kini sa pagtuman. Giingon pa sa gobernador nga ang dili pagsunod mahimong maihap nga tinuyo nga pagsupak ubos sa Section 60 sa RA 7160, ug posible kini nga i-endorso sa DILG Region 7 alang sa administratibong proseso gawas pa sa ubang legal nga lakang.
Lakip sa direktiba ang pagpasumite sa kompletong public documents sama sa zoning clearance, Environmental Compliance Certificate (ECC), ug uban pang may kalabutan nga permit sulod sa lima ka adlaw nga trabaho. Gipasabot usab nga kinahanglan magtinabangay ang LGU sa Santa Fe ug ang DENR-EMB Region 7 aron sa technical validation, ilabina sa pagpatuman sa salvage zone ug height restrictions.
Gitumbok sa gobernador nga ang Stria Hotel adunay clearance lamang gikan sa Protected Area Management Board (PAMB) alang sa pagtukod sa tulo ka andana nga building. Apan nasuta nga ang aktuwal nga gitukod misaka na ngadto sa 11 ka andana nga high-rise building, nga klaro nga paglapas sa regulasyon.
Kini nga lakang sa probinsyal nga panggamhanan nagpakita sa determinasyon nga ipatuman ang balaod sa kalikupan ug panalipdan ang Bantayan Island gikan sa sobra nga pagtukod nga mahimong mosangpot sa kadaot sa tan-awon ug natural nga kahimtang sa isla.
I via Renante Socia Lada