Nagpahimangno ang Police Regional Office 7 (PRO-7) sa publiko mahitungod sa usa ka scam diin ang mga scammer nagpapatoo nga Chief PNP o ubang police officer aron limbongan ang katawhan. Ang maong mga mangingilad mogamit og text messages o mutawag aron mangayo og kwarta, personal nga pabor, o mosulay og pangilad pinaagi sa peke nga legal nga pasangil.
Nakadawat ang PRO-7 og daghang reklamo bahin sa kini nga modus, diin ang scammer motawag o motext sa usa ka tawo, magpaila nga police officer, ug mangayo og motawag balik tungod sa kunohay warrant o affidavit. Kung tubagon sa biktima, ilang hadlukon ug pangayuan og kwarta o personal nga impormasyon.
Matod ni Regional Director PBGEN Redrico Atienza Maranan, dili gyud mangayo og kwarta, personal nga pabor, o tawag balik ang Chief PNP o bisan kinsa nga police officer gamit ang text o tawag. Gigamit sa mga scammer ang kasaligan sa PNP aron makapanikas gamit ang peke nga identidad ug scripted nga mensahe.
Gipasalig sa PRO-7 nga hugot nga ipatuman ang balaod batok niining mga scammer ug sila magtinabangay sa PNP Anti-Cybercrime Group (ACG) aron matrace ug madakpan ang mga responsable.
“We strongly condemn these fraudulent activities that exploit the trust of the public. Let this serve as a warning—anyone caught impersonating the Chief PNP or any police officer for personal gain will face the full force of the law. We urge everyone to stay vigilant and report any suspicious activities immediately. Together, we can put an end to these scams and protect our communities”, segon ni PBGen Maranan.
Giawhag sa PRO-7 ang tanan nga magpabiling mabinantayon batok sa mga online ug phone scams. Sa di pa motubag sa mga kadudahang text o tawag, siguraduhang ma-verify ang impormasyon. Kung makadawat og susamang scam, ipahibalo dayon sa PNP Anti-Cybercrime Group pinaagi sa ilang hotline: 0998-598-8105.
Source: PRO7-PIO
I via Renante Socia Lada