Gipalig-on sa Cebu City Police Office (CCPO), nga pinangulohan ni PCOL Enrico E. Figueroa, ang ilang kampanya batok sa mga organisadong gun-for-hire nga grupo sa syudad sa Sugbo. Niadtong Marso 10, sa usa ka press conference, gipahibalo ni Police Regional Office 7 (PRO-7) Regional Director PBGEN Redrico A. Maranan nga walo (ka suspetsado ang nadakpan nga nalambigit sa daghang insidente sa pagpamusil.
Sa nasayran, duha ka babaye ang nabiktima sa pagpamusil sa Duljo-Fatima ug Mambaling. Sa paspas nga aksyon sa Mambaling Police Station 11, nadakpan ang tulo ka suspetsado, lakip ang usa ka 18-anyos nga estudyante ug usa ka 40-anyos nga ex-convict nga may koneksyon sa Tañeza Group.
Duha pa ka suspetsado ang padayon pang gipangita, samtang ang usa ka 15-anyos nga menor de edad naluwas ug natagaan og tukmang interbensyon sa gobyerno.
Matod sa imbestigasyon, ang 40-anyos nga ex-convict sa Mambaling maoy nagplano sa pagpamusil. Siya unang nasikop niadtong Pebrero 17 tungod sa ginadiling drogas ug iligal nga armas.
Mahinomduman, gipusil patay ang usa ka 28-anyos nga babaye, samtang ang usa ka 44-anyos nga babaye nakaluwas sa laing insidente.
Ang mga suspetsado mag atubang sa mga kaso nga murder, frustrated murder, iligal nga pagpanag-iya og armas, ug iligal nga drogas, nga gisang-at na sa korte.
Gipadayag ni PCOL Enrico E. Figueroa ang iyang pagpasalamat sa Mambaling Police sa ilang paspas nga aksyon. Sumala niya, kini nga operasyon usa ka mahinungdanong lakang sa krimen prevention program sa PRO-7 aron mabantayan ang katawhan ug malikayan ang dugang krimen.
Nagpabilin ang CCPO nga determinado sa pagpatuman sa hugot nga imbestigasyon aron masiguro nga manubag ang tanang kriminal ug mabantayan ang kalinaw sa komunidad.
Source: CCPO
I via Renante Socia Lada