Usa ka suspetsado sa pagpamusil sa Brgy. Gutlang, Argao, Cebu ang napatay sa kapolisan atol sa usa ka hot pursuit operation alas 1:08 sa hapon, Marso 12, 2025. Gidala pa kini sa Isidro Kintanar Memorial Hospital, apan gideklarar nga patay pag-abot sa tambalanan.
Ang napusilan nga suspek giila nga si Noel Rosero, minyo ug lumulupyo sa maong dapit. Si Rosero maoy gitumbok nga responsable sa pagpamusil-patay kang Aurelio “Auring” Bañagaso, 51 anyos, nga taga Brgy. Lengigon, Argao.
Sumala sa imbestigasyon, si Bañagaso nagpalit og pan ug softdrinks sa usa ka tindahan alas 11:00 sa buntag, dihang kalit siyang giduol sa suspek ug gipusil sa bokoboko. Gidali pagdala sa ospital ang biktima, apan gideklarar nga dead on arrival.
Human sa krimen, gilusad dayon sa kapulisan ang operasyon nga gipangulohan ni Police Major Janus Giangan, hepe sa Argao Police Station. Nakit-an ang suspetsado ug misukol kini sa mga pulis, hinungdan sa iyang pagkamatay.
Sa crime scene nakuha ang mga bala, magazine ug 9mm pistol.
Sa pagkakaron, ang kapolisan sa Argao Police Station nagpadayon sa ilang imbestigasyon aron mahibaw-an ang posibleng motibo sa krimen.
I via Renante Socia Lada