Padayon nga gipalig-on sa Police Regional Office 7 (PRO-7) ang ilang plano sa seguridad alang sa ASEAN Summit 2026, ubos sa liderato ni PBGEN Redrico A. Maranan.
Niadtong Enero 24, 2026, gipangunahan ni PBGEN Maranan ang usa ka coordination meeting bahin sa ka-andam sa seguridad sa ASEAN Summit, nga gihimo sa Summit Galleria, Cebu City.
Tumong sa miting ang paghiusa ug pag-uyon sa mga plano sa seguridad kauban ang ubang security sectors ug mga stakeholders.
Gihisgutan sa miting ang pagpahimutang sa mga pulis, pagbantay sa mga lugar, intelligence sharing, contingency plans, ug paglikay sa bisan unsang hulga aron masiguro ang kaluwasan sa mga dignitaries, delegado, mga venue, ug sa katawhan atol sa summit.
Gipadayag usab ni PBGEN Maranan nga 24/7 ang trabaho sa mga pulis sa Central Visayas, apil na ang weekends, aron mapadayon ang lig-on nga seguridad. Gisugo niya nga andam kanunay ang mga sakyanan sa pulis, communication equipment, protective gear, ug uban pang kinahanglanon alang sa operasyon.
Sumala ni PBGEN Maranan, dakong garbo sa nasud ug responsibilidad sa rehiyon ang malampusong pagdumala sa ASEAN Summit 2026. Klaro usab niyang giingon nga walay lugar ang kahuyang sa seguridad, walay shooting incident, walay security breach, ug walay paglapas sa disiplina nga pasagdaan.
Gilauman nga ang tanang pulis sa PRO-7 magserbisyo uban sa propesyonalismo, pagbantay, ug lig-on nga paningkamot alang sa kaluwasan sa publiko.
Source: PRO7 PIO
I via Renante Socia Lada