Gipahigayon ang usa ka wreath-laying ceremony sa Camp Sergio Osmeña, Sr. sa Cebu City isip paghinumdom ug pagpasidungog sa 44 ka miyembro sa Philippine National Police–Special Action Force (SAF) nga namatay atol sa operasyon sa Mamasapano, karong adlawa, Enero 25, 2026
Mitambong sa maong seremonya ang mga opisyal sa Police Regional Office 7 (PRO7), kapulisan, ug ubang mga kaabag sa komunidad. Naghalad sila og mga pag-ampo ug bulak isip pagpasidungog sa SAF 44, nga giila tungod sa ilang kaisog, dedikasyon, ug pag-alagad sa nasud.
Sa maong okasyon, gipabasa ni PRO7 Regional Director PBGEN Redrico A. Maranan ang mensahe ni PNP Chief PLTGEN Jose Melencio C. Nartatez Jr. Matod sa mensahe, ang National Remembrance Day dili lang paghinumdom sa nahitabo, kondili paghinumdom usab kung kinsa ang SAF 44 ug ngano nga importante gihapon ang ilang sakripisyo. Usa kini ka pahinumdom sa pagpasidungog sa kaisog, pag-ila sa sakripisyo, ug pagbag-o sa saad sa pag-alagad dili lang isip kapulisan, kondili isip mga Pilipino.
Gipasiugda usab sa mensahe nga ang SAF 44 dili lang mga elite nga pulis, kundili mga anak, bana, amahan, igsoon, ug higala nga mipili sa pag-alagad bisan pa sa kakuyaw sa ilang trabaho.
Alang sa mga pamilya sa mga namatay, gipadayag sa PNP nga bisan unsang pulong dili gyud makapawala sa ilang kasakit.
Gipahinumdoman sila nga wala sila nag-inusara, ang PNP ug ang nasud naghinumdom, nagpasidungog, ug nagbarog uban kanila. Ang mga ngalan sa SAF 44 magpabilin sa kasaysayan ug magpadayon nga mahimong inspirasyon sa tanang kapulisan.
Gipadayag sa PRO7 ang ilang padayon nga paningkamot sa pagpreserbar sa legasiya sa SAF 44 pinaagi sa pagpalig-on sa propesyonalismo, accountability, ug tinuoray nga pag-alagad sa katawhan. Ang maong seremonya nagpahinumdom nga ang ilang sakripisyo dili gyud malimtan ug magpadayon nga magdasig sa kapulisan sa pagpanalipod sa kalinaw ug kahusay sa Central Visayas ug sa tibuok nasud.
Source: PRO7 PIO
I via Renante Socia Lada