Daghang residente sa Camotes Island ang nagtigom sa Ricardo L. Maningo Memorial Hospital sa lungsod sa San Francisco aron moapil sa pre-screening alang sa umaabot nga Surgical, Eye, ug Medical Mission sa Capitol, sa nakalabay na adlaw.
Ang maong medical mission ipahigayon sa Marso 28 hangtod 29, 2026 nga gitumong aron matabangan ang mga residente nga nagkinahanglan og espesyal nga pag-atiman sa panglawas.
Lakip sa mga serbisyong ihatag ang eye check-up ug operasyon sa mata sama sa cataract ug pterygium. Aduna usab mga major surgeries sama sa hernia, goiter, myoma, ovarian cyst, ug gall bladder stones.
Maghimo usab og minor surgeries sama sa pagtangtang sa cyst, lipoma, ug breast mass alang sa mga pasyente nga kwalipikado sa operasyon.
Sumala sa Capitol, kabahin kini sa programa ni Cebu Governor Pamela S. Baricuatro aron mapalapdan ang akses sa kalidad nga serbisyo medikal, ilabi na sa mga lugar nga layo sa Cebu City diin kasagaran nahimutang ang daghang ospital ug medical centers.
Source: Cebu Province PIO
I via Renante Socia Lada