Magpadala og labing menos 80 ka dugang nga personnel ang Department of Labor and Employment Central Visayas (DOLE 7) aron motabang sa mga ospital nga gipadagan sa Cebu Provincial Government sulod sa siyam ka bulan.
Sumala sa DOLE 7, ang tanang gasto sa maong mga personnel abagahon sa ilang Government Internship Program (GIP) busa wala kini’y gasto sa pondo sa probinsya.
Matod ni DOLE 7 Regional Director Atty. Roy Buenafe, ang programa nagtumong sa paghatag og oportunidad sa mga kabatan-onan, ilabi na kadtong gikan sa kabus nga pamilya, aron makakuha og trabaho ug praktikal nga kasinatian sa pagtrabaho sa gobyerno.
Dugang pa niya, dako kini og tabang sa mga ospital tungod kay makagaan kini sa trabaho sa mga doktor, nurse ug ubang empleyado, ilabi na sa mga buluhaton nga dili medikal.
Gisuportahan usab ni Dr. Nikki Catalan, health consultant sa Capitol, ang maong inisyatiba. Matod niya, makatabang ang mga interns sa clerical work, pag-encode sa dokumento, pagproseso sa PhilHealth claims, ug uban pang administrative nga buluhaton, ilabi na karon nga padulong na sa digitalization ang sistema sa mga ospital.
Ang mga interns maglakip sa high school, college, ug technical-vocational graduates. Sila bayran sa DOLE sa regional minimum wage nga P540 matag adlaw ug itudlo sa mga trabaho sama sa office support, document encoding, kitchen assistance, ug uban pang non-clinical tasks.
Ang maong programa nagtinguha usab sa pagtabang sa mga bag-ong graduates nga makakuha og trabaho nga kasinatian samtang nagtabang sa pagpalig-on sa serbisyo sa mga ospital sa Probinsya sa Sugbo.
Source: Cebu Province PIO
I via Renante Socia Lada