Nagtapok ang gatusan ka mga batang campus journalists gikan sa tibuok Central Visayas sa Danao City, Cebu alang sa Regional Schools Press Conference (RSPC) nga gipahigayon sa Department of Education (DepEd).
Ang maong kompetisyon nagtumong sa pagpalambo sa campus journalism, ethical writing, ug responsableng pagbalita sa mga estudyante. Ang mga mananaog sa division level moabante sa regional level ug ang labing maayo mopadayon sa National Schools Press Conference.
Ang mga partisipante gikan sa elementarya hangtod senior high school nakigkompetensya sa nagkadaiyang kategorya sama sa news writing, feature writing, sports writing, copy editing, photojournalism, ug radio broadcasting.
Gipadayag usab sa Probinsya sa Cebu ang suporta niini sa mga batan-ong magsisibya pinaagi sa mensahe ni Cebu Governor Pamela S. Baricuatro nga gibasa ni Provincial Information Office (PIO) Head Ainjeliz de la Torre-Orong.
Sa mensahe sa gobernador, iyang gidayeg ang mga partisipante ug giingon nga ang campus journalism dako og papel sa paghulma sa responsableng kabatan-onan ug mga lider sa umaabot.
Gidasig usab niya ang mga batan-ong journalist nga ipadayon ang paghisgot sa mga istorya nga importante ug magpabilin nga responsable ug matinud-anon sa pagbalita, ilabi na karon nga paspas ang pagkatag sa impormasyon.
Ang maong RSPC karong tuiga gipasiugdahan sa City Government of Danao uban sa suporta nila Mayor Ramon “Nito” Durano III ug Vice Mayor Ivy Durano, kauban ang mga opisyal sa siyudad ug mga partner sa edukasyon aron masiguro ang malampusong pagdumala sa kalihokan.
Source: Cebu Province PIO
I via Renante Socia Lada