Ang Cebu Police Provincial Office (CPPO) mipahigayon og sunod-sunod nga operasyon batok sa kriminalidad gikan Hunyo 22 hangtod 29, 2026, nga miresulta sa daghang nadakpan ug mga kaso nga napasaka.
Base sa report sa CPPO ubos sa pagpangulo ni Police Colonel Abubakar Udang Mangelen Jr., 55 ka anti-illegal drugs operations ang ilang gihimo diin 75 ka drug suspects ang nadakpan. Narekober usab ang 341.50 gramos nga gidudahang shabu nga adunay balor nga ₱2.32 milyon. Tungod niini, 122 ka kasong kriminal ang napasaka.
Sa kampanya batok sa mga wanted person, 48 ka operasyon ang gihimo nga miresulta sa pagserbisyo sa 53 ka warrant of arrest ug pagdakop sa 48 ka wanted persons. Lakip niini ang tulo ka Most Wanted Persons ug 45 ka ubang wanted persons.
Padayon usab ang operasyon batok sa ilegal nga armas. Sa 30 ka operasyon, 11 ka tawo ang nadakpan, 15 ka armas ang nakumpiskar, samtang 16 ka armas ang boluntaryong gitugyan sa kapulisan. Aduna usab 12 ka kasong kriminal nga napasaka.
Sa kampanya batok sa ilegal nga sugal, 21 ka operasyon ang gihimo diin 49 ka mga lumalapas ang nadakpan. Nakuha usab ang ₱10,590 nga kuwarta nga gigamit sa sugal ug 21 ka kaso ang napasaka.
Samtang sa pagpatuman sa Safer Cities Initiative, nakapahigayon ang CPPO og 1,659 ka operasyon sa tibuok lalawigan. Tungod niini, 2,017 ka mga nakalapas ang gipamulta, 1,104 ang gipahimangnoan, ug nakolekta ang kapin ₱863,000 nga multa.
Matod ni PCOL Mangelen, magpadayon ang CPPO sa pagpalig-on sa ilang kampanya batok sa kriminalidad ug sa pagtinabangay sa komunidad aron mapadayon ang kalinaw ug kaluwasan sa tibuok lalawigan sa Sugbo.
I via Renante Socia Lada