Gikumpirma sa Cebu Police Provincial Office (CPPO) nga walay foul play sa pagkamatay sa usa ka 83-anyos nga babaye nga nakaplagang patay sa iyang panimalay sa Barangay Candabong, Dumanjug, Cebu, niadtong Pebrero 1, 2025.
Ang insidente gisumbong sa usa ka nagpakabana ngaresidente, nga misangpot sa daliang pagresponde sa kapulisan. Sa imbestigasyon, nakita nga anaa na sa advanced state of decomposition ang lawas sa biktima, ug nakaplagan nga nabuwag na ang iyang ulo sa ubang bahin sa iyang patay’ng lawas.
Base sa inisyal nga imbestigasyon nagpuyo ang tigulang nga babaye nga nag-inusara uban sa upat ka iro, duha sa kanila bag-ohay lang nanganak. Gilantaw sa mga imbestigador ang posibilidad nga ang mga iro nakakaon sa iyang patay’ng lawas tungod sa dugay nga walay nakahibalo sa iyang pagkamatay.
Padayon ang imbestigasyon aron matino ang eksaktong hinungdan sa iyang kamatayon. Nakig alayon na usab ang kapulisan sa mga animal welfare groups aron ma-evaluate ang kahimtang sa mga iro ug masiguro nga matagan sila og hustong pag-atiman.
Sumala sa Scene of the Crime Operatives (SOCO), wala’y timailhan sa panagbangi, pagpanglungkab, o pagpangawat. Ang tanang butang sa biktima, lakip na ang iyang kwarta ug alahas, nagpabiling komplito.
Ang medical findings nagpakita nga duha na ka adlaw nga patay ang biktima sa dihang nadiskubre siya.
Gipasalig ni PCOL Jovito M. Atanacio, Acting Provincial Director sa CPPO, nga walay krimen nga nalambigit sa maong panghitabo.
“We want to set the record straight—there is no foul play in this incident. The evidence gathered by our investigators and SOCO clearly indicates that this is an unfortunate case, but not a criminal one. We urge the public to avoid spreading misinformation that may cause unnecessary fear or panic. Rest assured, Cebu PPO remains committed to delivering factual and transparent investigations to uphold public trust.” segon ni PCol. Atanacio.
Padayon nga naghatag og suporta ang kapulisan sa pamilya sa biktima. Pahimangno usab sa mga awtoridad nga sigurohon nga husto ug tinood ang impormasyon sa dili pa kini ipakatap aron malikayan ang sayop nga espekulasyon. (Renante Socia Lada)
(Source: CPPO)