Nagpadayon ang hot pursuit operation sa Mabolo Police Station sa CCPO batok sa duha ka suspek nga gitumbok sa pagdunggab ug pagpatay sa giingong usa ka police asset nga si Ian Vanlor Lumapas, 24-anyos, residente sa Barangay Barrio Luz, Dakbayan sa Sugbo.
Ang insidente nahitabo pasado alas-11 sa gabii niadtong Enero 20, 2025, sa usa ka internet café sa maong barangay. Base sa inisyal nga imbestigasyon, nag-inom ang biktima kauban ang duha ka suspek nga giila nga sila si Stephen Felizarta alyas “Bilon” ug Allen Edward Felices alyas “Bantoy,” nga pulos residente usab sa maong lugar.
Human ang inom, misulod si Lumapas sa internet café, apan pipila ka minutos ang milabay, miapas ang duha ka suspek ug nanugo og bata aron ipagawas ang biktima. Pagpanggawas ni Lumapas, kalit siyang gidunggab sa nagkadaiyang bahin sa lawas, dayon misibat ang mga suspek.
Gidala pa sa Perpetual Succour Hospital ang biktima, apan gideklarar nga dead-on-arrival. Sumala sa hepe sa Mabolo Police Station nga si Police Major Romeo Caacoy, ang duha ka suspek kaniadto nang nabilanggo tungod sa kaso sa ilegal nga drugas ug nagtuo nga si Lumapas maoy nagpadakop kanila.
Ang kapulisan nag-imbestiga usab sa posibilidad nga adunay kalambigitan sa ilegal nga drugas ang hinungdan sa krimen. Nagpadayon ang pagpaningkamot sa awtoridad nga madakpan ang mga suspek nga hangtod karon padayon pang nagtago.
I via Renante Socia Lada