Nagplano ang Philippine National Police–Regional Anti-Cybercrime Unit 7 (PNP-RACU 7) nga magtukod og digital forensic laboratory sa Cebu aron moserbisyo sa tibuok Visayas — apil ang Regions 6, 7, 8 ug ang Negros Island Region.
Kini gipahibalo ni Police Colonel Jay Guillermo, bag-ong hepe sa PNP-RACU 7, atol sa iyang courtesy visit kang Gov. Pamela Baricuatro sa Kapitolyo niadtong Nobyembre 13, 2025.
Sumala niya, ang Cebu mao’y pinakamaayong lokasyon kay sayon kini adtoon sa tanang rehiyon sa Visayas. Anaa na usab ang Kapitolyo sa pagpangita og lugar nga mahimong tukoran sa maong laboratoryo.
Ang digital forensics naghisgot sa pagkuha, pag-analisar, ug pag-imbestigar sa electronic data aron mahimong lig-on nga ebidensiya nga magamit sa korte.
Ang PNP-RACU, ubos sa Anti-Cybercrime Group, maoy nagpatuman sa cybercrime laws, nag-imbestigar sa mga cyber-related crimes, ug nagpasabot sa publiko aron malikayan ang mga krimen online.
Gisuportahan ni Gob. Baricuatro ang proyekto ug giingon niyang dako kini’g tabang aron maprotektahan ang mga Sugbuanon ug ang katawhang Visayas batok sa nagkadaghan nga hulga sa digital nga kalibutan.
Source: Cebu Province PIO
I via Renante Socia Lada